Allt í reyk

Fimmtudaginn síðastliðinn sótti ég tónleika á Gauki á Stöng. Við höfum oft farið á tónleika þar og alltaf hefur það verið ágætt. Staðurinn er frekar stór og ekki beint um kósýheit að ræða en eitthvað kemur í staðinn sem virkar ágætlega, skolað niður með einum bjór í gleri.

Þrjár hljómsveitir voru á dagskrá, Hraun, Hlynur Ben og hljómsveit og svo Múgsefjun. Ég ætlaði hinsvegar ekki að tala um þær neitt sérstaklega. Það sem jókst jafnt og þétt þegar leið á kvöldið var neflilega reykurinn. Drengur sat á næsta borði og keðjureykti. Stúlka sat fyrir aftan hann og reykti líka álíka mikið. Fljótlega tók ég eftir því þegar ég leit í kringum mig að annað hver maður virtist hafa kveikt sér í rettu þarna inni.

Ég sem hafði fengið svo gott frí frá þessu síðustu mánuði. Mér fannst þetta ekkert lítið óþægilegt og beinlínis dónalegt, það voru mín fyrstu viðbrögð. Óháð því hvort eitthvað sé sett í lög eða ekki, þá var ég einfaldlega orðin vön því að vera blessunarlega laus við reykinn. Þegar hann kom aftur, fann ég hversu óþægilegt það var. Hvað þá þegar ég var komin heim og hárið á mér angaði af "djamminu".

Ég velti líka fyrir mér hvað fyrir þeim vakti sem reyktu eins mikið og þau gátu á eins áberandi hátt og þau gátu. Eru þetta skipulögð mótmæli meðal reykingamanna? Eða langar þeim einfaldlega að kveikja sér í og er slétt sama um lög þessa lands?

Nú veit ég að það er engin alvarleg refsing við þessu víst og þess vegna sé öllum slétt sama um að brjóta lögin. Ég hugsa hinsvegar um skemmtistaðina og heiður þeirra. Það þurfti að hafa allt opið á Gauknum til þess að lofta út. Nú var ekki beint sumarveður og þess vegna skalf maður úr kulda þarna fyrir vikið, í alveg jafn miklum reyk. Endar þetta ekki með því að eftir stendur fullur salur af reykingafólki, í úlpunum sínum að púa reykinn.

Eitthvað var vitlaust við ástandið og ljóst að annaðhvort þarf ríkistjórn eða eigendur skemmtistaða að endurskoða þessi mál.

Athugasemdir

[Friðjón Magnússon (IP-tala skráð) 11.2.2008 kl. 22:08]

 

Ég er hjartanlega sammála þessari grein. Ég reyki reyndar ekki sjállfur og þar sem ég tengist rithöfundi þessarar greinar að þá ætla ég ekki að segja meira um greinina annað en það að ég sé sammála henni. Hins vegar vil ég endilega fá að heyra annara manna álit á þessum reykingum sem sumir skemmtistaðir höfuðborgarinnar hafa tekið upp aftur. Það væri gaman að heyra álit allra, reyklausra og reykingamanna.  Er þetta það sem fólk vill að verði leyft aftur?????  Mitt svar: NEI TAKK.

 

[Aðalheiður Haraldsdóttir, 14.2.2008 kl. 08:47]

Sammála - ekki spurning!  Ég hefði ekki haldið út þarna inni  þar sem ég þoli tóbaksreyk afar illa.  Þetta er auðvitað bara skref afturábak og augljóst að það verður erfitt að gera öllum til hæfis í þessum efnum.

[Þórey Harpa (IP-tala skráð) 18.2.2008 kl. 11:25]

En hvað ég er sammála þér ! Finnst að ef það er verið að setja lög á annað borð að það ætti að framfylgja þeim. Hvað reykingarklefa varðar finnst mér að þeir ættu ekki að vera til staðar - og þar með ætti þeir heldur ekki að vera til staðar á þingstað borgarinnar ! Einhver þarf að vera fyrirmyndin og hver þá annar en þeir sem setja lögin !

[Hulda Rós Sigurðardóttir, 18.2.2008 kl. 21:04]

Takk fyrir athugasemdirnar. Mér finnst neflilega að það heyrist of sjaldan í fólki sem hefur þessar skoðanir, frekar heyrist mjög hátt í þeim sem langar að reykja á börum borgarinnar og vilja aflétta banninu.

Ég er sammála þér Þórey Harpa, fólk getur bara reykt úti, það er nú ekki langt í sumarið. Ég veit að þeir sem reykja verða voðalega fúlir og finnst það sé brotið á þeim, það er einfaldlega ekki brotið á þeim miðað við hvað er brotið á okkur hinum að þurfa að sætta okkur við óbeinar reykingar. Hvar liggja mannréttindin í raun og veru?